CORÂL “GOTIS DI NOTIS”
La corâl “Gotis di Notis” di Cjassà e nas in tal 1998 pal volê dai zovins e mancul zovins di puartâ indevant la tradizion corâl dal puest inlidrisade te comunitât.
L’Associazion, afiliade a l’ USCI FVG e ae FENIARCO, al à il fin di secondâ la difusion e il svicinâsi al cjant corâl e ae musiche sot ogni forme.
Tal cors di chescj agns e son stâts frontâts tocs religjôs e tocs de tradizion popolâr furlane cirint e volint, di an in an, slargjâ e lâ in miôr cul repertori ch’al va dal gregorian e polifonie di glesie e no di glesie.
E son stadis tantis lis ocasions par avualâsi cun corâls de nestre provincie, cul Gurizan, il Venit e cu l’Austrie e la Slovenie.
Al merete di sei notât: il spetacul fat viodi in tal mai dal 2006 a trent’agns dal taramot, “ Par mai, Par simpri”, proponût in tancj paîs de provincie cu la presentazion di une publicazion leade al orcolat; la partecipazion in tal dicembar dal 2007 al premi “Nadâl furlan” di Buje cun tocs metûts adun a pueste dal mestri Luciano Turato su poesie dal poete Tite Galeri e la realizazion de colone sonore dal dvd burît fûr di Anna Maria De Monte “ Cjampanes” in tal 2009.
Simpri in tal 2009 la corâl e à volût memoreâ il scritôr Carlo Sgorlon cuant che, in tal moment de sepulture tal cimitieri di Raspan di Cjassà, e à dedicât il cjant Lidrîs ch’al ricuarde il leam dal scritôr cu la sô tiere e la sô int.
Ultin progjet e je stade la realizazion dal dvd “Concerti sacri” in tal otubar dal 2010 su la Missa Brevis di Jacob de Haan.
Dal fevrâr dal 2011 la corâl e je deventade istituzion culturâl di interes comunâl.
In tal dicembar dal 2012 la corâl e à inmaneât un zîr in Umbrie cu la propueste di putrops concierts di musiche sacre e profane, tra i cuai a Citerna (PG) in ocasion dal restaur de Madone con Frutin, opare dal Donatello, a Città di Castello (PG) in ocasion de Mostre Internazionâl di Art Presepiâl e a Assisi (PG) in te Basiliche Papâl di Sant Francesc.
Cumò il grop al à sui 25 cjantôrs che a vegnin di Cjassà e dai paîs dongje e al è diret dal mestri Nicola Simeoni.
Lascia un commento